„Потпретседателот на ДУИ и пратеник од оваа партија Изет Меџити не ја објавува својата одлука дали ќе гласа, или не, за Владата предложена од Ковачевски. ‘Ќе видиме.’ – одговара тој на прашањето дали ќе гласа за оваа нова Влада.“ – пишува весникот на албански јазик „Лајм“.
„Лајм“ го цитира и вториот дел на изјавата на Изет меџити: „Мојот критички став за министрите на ДУИ останува ист. Се уште има недоразбирања во рамки на партијата, но ќе расправаме во нејзините органи, за да ги одбегнеме тие недоразбирања и да ја направиме ДУИ посилна“
Инаку, набргу по локалните избори така наречената „Огнена група“ во ДУИ најави дека ќе бара свое повисоко позиционирање во рамки на матичната партија, но веќе и учество во составот на новата Влада на Македонија соодветно на резултатите од „победничките зони“ на локалните избори, на кои токму овие „внатрешно – партиски дисиденти“ и донесоа успеси на Демократската унија за интеграција. „Огнената група’ претставува своевидна внатрешно – партиска струја на „бунтовни“ и незадоволни функционери и членови, предводена токму од потпретседателот Изет Меџити, Муса Џафери и Блерим Беџети. „Огнената група“ во неколку пригоди упати остри критики до првиот заменик – претседател на Владата Артан Груби, поради „неуспешниот начин“ на водење на предизборната кампања на ДУИ за локалните избори, што и „донело слаби резултати во важни градови“.
