„Изгледа дека и на Груби, исто како на Кастриот, еден “висок функционер” на ЕУ му се јавил на телефон да му каже дека Македонија најдоцна до крајот на месец март ќе го добие датумот за почеток на преговорите“, реагира на Фејсбук аналитичарот и екс-министер за финансии Џевдет Хајредини.
Повод за објавата е изјавата на првиот вицепремиер Артан Груби според кој „апсолутно постои оптимизам за преговори и за добивање позитивен сигнал на декемврискиот самит на ЕУ за отпочнување на преговори за нас и за Албанија во првите месеци од следната година“.
Прашан како ја толкува вчерашната порака од Бугарија дека нема да се промени нивниот став, Груби повтори дека се надеваат на конструктивен пристап од бугарска страна.
„Имаме нова влада која треба да се избере. Ќе комунуцираме со новата влада, која е резултат од изборите коишто само што завршија во соседна Бугарија и се надеваме на тој конструктивен пристап затоа што кај нас има лодготвеност за компромис којшто е достоинствен и за нашата земја посебно за моите сограѓани Македонци“, рече Груби
Претставниците од Илиндеска првично најавуваа дека има простор за старт на преговорите до крајот на оваа година, но вчерашната позиција на бугарската Влада, очигледно ги помести прогнозите.
