Демократската Унија за Интеграција, кампањата за локалните избори што ќе се одржат на 17 октомври ќе ја започне од Гостивар, соопшти на денешната прес-конференција, Крешник Бектеши.
„Кампањата за локалните избори ќе почне в понеделник токму од Гостивар затоа што го слушнавме гласот на граѓаните на Гостивар кои бараат промена во општинската администрација и ослободување од кучињата скитници, казината, чадот од Русино, густиот сообраќај, недостаток на паркинзи и од неспособноста на Таравари”, рече Бектеши и додаде дека во текот на кампањата во сите градови, општини и населени места ќе ги претставаат кандидатите за градоначалници и опшинските совети.
Тој ги повика сите учесници на изборите да спроведат мирна, демократска и позитивна кампања и сите да ги искористат 20/те денови за подобра презентација на изборните програми.
ДУИ на локалните избори ќе настапи со 19 кандидати за градоначалници и 35 листи за советници со пет завети како столбови на нивната платформа: Зелена агенда, Дигитална агенда, Агенда за вклучување на граѓаните, Агенда за отворени врати и Агенда Нулта толеранција.
Бектеши уште најави дека ДУИ, не само што ќе ја почне, туку и ќе ја заврши кампањата во Гостивар.
