Незадоволни родители, наставници и ученици точно на пладне на голем број локации во земјава ќе го изразат своето незадоволство од реформите на министерката за образование Мила Царовска и нејзината влада.
Откако министерката Мила Царовска одби да се сретне со претставници од иницијативата „Учебници и настава мора да има”, за денес се најавени протести во повеќе градови во Македонија.
Со почеток од 12 часот, протестот во Скопје ќе се одржи пред Министерството за образование и наука, додека во другите градови, родителите и учениците ќе протестираат пред општините.
На социјалните мрежи деновиве реагираа ученици, наставници и родители дека се вршат притисоци за да не се излезе на протестот.
Директорите на голем број од училиштата претходно бараа и списоци од кои ученици ја бојкотираат наставата.
Во некои училишта, класните раководители се заканувале со намалено поведение за оние кои покажуваат отпор на образовните реформи.
И покрај силните реакции од јавноста и незадоволството, министерката Царовска не отстапува од својата идеја, при што континуирано обвинува дека се работи за „мали групи на партиски ботови” кои се спротиставуваат на промените.
