Сите 2.000 дози од вакцините против сезонски грип се продадени за неколку часа откако почна вакцинацијата во Центарот за јавно здравје Скопје, изјави за МИА директорот на Центарот за јавно здравје Скопје, Александар Стојанов.
Цената на една доза е 800 денари. Тој најави дека се чекааат уште 2.000 вакцини „на приватно“ , но не се знае кога ќе бидат испорачани.
Во врска со тоа кога очекуваат да ги добијат тие 2000 вакцини, рече дека тоа зависи од дистрибутерот „Елбиор”. Овие вакцини се однесуваат само за Скопје, бидејќи се набавени преку Центарот за јавно здравје Скопје.
„Осумдесет отсто од категориите граѓаните кои требаше да ги добијат бесплатно вакцините, дојдоа кај нас и ги потрошија. Причината е тоа што во „МојТермин” оваа недела им е пополнет терминот и луѓето не сакаат да чекаат, сакаат да си платат и да завршат побрзо работа. Луѓето се исплашени и сакаат да си го заштитат здравјето. И за ризичните и неризичните групи има малку дози. Тоа го има во цел свет. Белгија за еден ден ги потроши. Минатата година 610 вакцини против грип ги фрливме, немаше кому да ги дадеме“, потенцира д-р Стојанов.
Министерството за здравство денеска соопшти дека почната е вакцинацијата против сезонски грип и дека годинава, за бесплатно вакцинирање се набавени 40.000 дози вакцини против сезонски грип, 12.000 повеќе споредено со минатата сезона.
Термините за бесплатно вакцинирање ги закажуваат матичните лекари, а се вршат во здравствените домови и општи болници во градовите. не само кај нас.
