Јавното обвинителство поднесе предлог за определување казнен налог против еден локален функционер на СДСМ и други две лица од Скопје за кривично дело “Непостапување според здравствените прописи за време на епидемија од член 206 став 1” од Кривичниот законик.
Според обвинението, обвинетите на 13 април околу 22 часот, во скопско Сингелиќ биле затекнати надвор од нивните домови, без да поседуваат дозвола за движење, со што ја прекршиле Одлуката за забрана и посебен режим за движење на територијата на Република Северна Македонија. ОЈО Скопје на Основниот кривичен суд Скопје му предложи на тројцата обвинети да им изрече парични казни од 100 дневни глоби, а висината на една дневна глоба да биде определена на износ од 50 евра.
По насоки на јавниот обвинител, Министерството за внатрешни работи постапува за идентификација на останатите лица кои на 13 април во знак на протест излегоа на улиците на Сингелиќ и го прекршија полицискиот час. Откако МВР ќе го документира целиот кривично-правен настан и ќе поднесе кривична пријава, Основното јавно обвинителство Скопје со приоритет ќе постапи согласно Законот за кривична постапка.
Еден од тројцата граѓани кои се гонат од МВР и ОЈО јавно објави дека во полициски час поставувал “лежечки полицаец” а потоа според Министерот Чулев вршел притисок врз полицајци користејќи ја позицијата советник на СДСМ во општина Гази Баба.
СДСМ ги повика сите граѓани да ги почитуваат мерките но се уште не го санкционирала поведението на својот локален функционер.
