Преку писмено соопштение адвокатот Панче Тошковски реагира на изнесените тврдења и обвинувањата на портпаролот на СДСМ, Костадин Костадинов дека додека бил директор на ЕЛЕМ Христијан Мицкоски испумпувал пари од граѓаните и му плаќал за адвокатски услуги на Тошковски.
Костадинов обвини дека Мицкоски додека бил директор склучил Договор за адвокатски – советодавни услуги со Панче Тошковски, од ВМРО-ДПМНЕ, со кој му дал 1.600.000 денари, за период од две години.
„Различни сме. Мене адвокатурата ми е професија од која егзистирам, а вам криминалот ви е професија од која се богатите на грбот на чесните граѓани.
Вистината е дека се работи за склучени потполно два различни договори, по отворена транспарентна постапка, и кога почнува вториот договор, се раскинува првиот договор. Впрочем тоа е договорот по кој работев како адвокат до пред 6 месеци, длабоко во мандатот кога Заев е премиер.
Сигурен сум дека ако имало барем тронка неправилност, тронка нарушување на процедурите, СДСМ со нејзините алатки во правосудството немаше да жали средства да направи прогон и за овој случај, a и нема да ме чуди направат монтажа како што тоа го прават редовно и често, но залудно. Доколку имаат некакви забелешки следниот пат го поканувам господинот Костадинов истите да ги адресира до неговиот шеф и доскорешен премиер Зоран Заев“, вели Тошковски во соопштението до јавноста.
