Оваа година ќе се одржи 44. по ред Галичка свадба. Тања Чаловска и Бошко Лепчески се годинешните младоженци кои ќе ја направат својата венчавка во селото Галичник. Се очекуваат повеќе од 5.000 посетители.
Галичката Свадба или Петровденската Галичка свадба оваа година се одржува на 15 и 16 (сабота и недела) јули. Богата е со многу оригинални, единствени и неповторливи свадбарски обичаи и ритуали. Во деновите на свадбата, пиштат зурлите и ечат тапаните “од Галичник до Река”, со сиот подземен и надземен екот кон каменот на Бистра и небесниот свод.
Галичката Свадба во своето опстојување придонела да се негуваат единствените свадбарски обичаи на жителите од овој крај, да се сочувааат изворните песни, ора и надалеку познатата галичка носија-изработена со филигранска прецизност и точност на терзиите. Секоја година посебна комисија избира двајца млади кои ќе се венчаат на Галичката свадба.
Секоја година за време на Галичката свадба, се почитуваат голем број на принципи кои ја карактеризираат оваа свадба: чукањето на тапаните, свекрвино оро, носењето на невестата на вода, поставувањето на свадбарскиот бајрак, канењето на мртвите, бричењето на зетот, земањето на невестата, замесувањето на лебот, венчавањето во црквата „Св. Петар и Павле”, и други обичаи, кои полека изумираат, но кои во себе содржат и кријат многу детали од животот на Галичанецот во минатото.
Секој Петровден во јули е ден на раскошните носии, езгиите, величествените обреди и ритуали на единствената Галичка свадба, чие пошироко значење своја круна добива со влегувањето во ризницата на духовни вредности на човештвото што се под заштита на УНЕСКО.
