Премиерот на Бугарија, Стефан Јанев, изјави дека во однос на Македонија, Владата во Софија има намера да го продолжи курсот што досега го водеше, односно да го заштити бугарскиот национален интерес на најдобар можен начин.
Во интервју за БНТ тој вели дека спорот меѓу двете земји не смее да се пренесе во ЕУ.
-Не треба да се дозволи спорот меѓу две соседни земји да се пренесе во ЕУ. Бугарија мора да се фокусира на дијалог и постојан контакт, со властите во Република Македонија да се бара решение во име на нашата заедничка иднина, коментира премиерот Стефан Јанев, додавајќи дека треба „да не се закопаме во минатото, туку да бараме решение во иднината”.
– Бугарија сака нормален дијалог, сака да го запре јазикот на омразата, како и воспитувањето за омраза кон Бугарија. Сака и да го запре лошиот однос кон луѓето со бугарска самосвест во Македонија. Така овие работи ќе се решат и ќе се најде вистинската формула, резимира Јанев, додавајќи дека се надева дека ова ќе се случи во блиска иднина.
Според него, по крајот на октомври и ноември, кога има политички избори во Македонија и Бугарија, дијалогот ќе добие нова смисла.
-Нема да има промена на бугарската позиција, бидејќи тоа го постави Народното собрание на Бугарија, рече премиерот Стефан Јанев.
