Околу 13.000 полицајци и жандармерија ќе бидат распоредени ширум Франција за време на денешните масовни протести од кои 5.500 ќе бидат стационирани во Париз.
Министерот за внатрешни работи Џералд Дарманен стравува дека ќе има обиди да се наруши јавниот ред.
Денеска ќе се одбележи десеттиот ден од протестите против реформите.
Во некои градови, протестите беа придружени со немири, грабежи и обиди за палење: во Бордо демонстрантите го запалија градското собрание, а во Париз беа регистрирани бројни подметнати пожари.
Во средината на март, француската влада ја одобри пензиската реформа, заобиколувајќи го парламентот.
Реформата предвидува зголемување на старосната граница за пензионирање од 62 на 64 години.
Макрон се соочува со криза што доведе до некои од најголемите штрајкови во Франција и најлошото улично насилство во последните неколку години, откако неговата влада го протурка неговиот непопуларен предлог-закон за пензиските реформи низ парламентот без гласање.
Макрон вети дека ќе продолжи со „демократскиот процес“ и ја чека одлуката на највисокото уставно тело на Франција, Уставниот совет, за нацрт-законот за пензиите.
