Мерка притвор од 30 дена, добија Раде Трајковски-Штекли и уште девет лица поради опасност од бегство, можност за повторување на делото и влијание врз сведоците, соопшти Основниот кривичен суд во Скопје.
Тие се осомничени за неовластено производство и трговија со наркотични дроги.
„Судија на претходна постапка при Основниот кривичен суд, постапувајќи по предлог на Основното јавно обвинителство за гонење организиран криминал и корупција, донесе одлука за притвор за десет лица. Исто така, одреден е притвор за уште две лица кои се недостапни за органите на прогон. Притворот ќе се спроведе веднаш по нивното пронаоѓањe“, соопшти судот.
Случајот е дел од поширока полициска акција насочена кон разбивање на организирани групи кои тргуваат со дрога. Според обвинителството, групата делувала на повеќе локации во Скопје, користејќи сложени методи за дистрибуција.
