Израелскиот премиер Бенјамин Нетанјаху го нарече неделниот напад во Рафах, во кој загинаа десетици раселени Палестинци, „трагичен инцидент“ во услови на зголемени меѓународни тензии, при што многу земји веќе го осудија нападот.
Тој инсистираше на тоа дека израелските одбранбени сили (IDF) направиле „максимални напори да не им наштетат на оние што не се вклучени“ во конфликтот, ветувајќи дека ќе продолжат со воената акција против Хамас.
„Немам намера да ја завршам војната пред да се постигне секоја цел“, рече категорично Бенјамин Нетанјаху во своето обраќање.
„Веќе евакуиравме околу еден милион луѓе кои не се борци во Рафах, и покрај нашите максимални напори да не им наштетиме на неборците, за жал, нешто тргна наопаку“, рече израелскиот премиер, додавајќи дека инцидентот моментално се истражува.
Најмалку 45 лица загинаа, според Министерството за здравство управувано од Хамас.
Лекари без граници (MSF) во понеделникот соопштија дека една од нивните медицински установи примила најмалку 28 мртви од нападот, вклучувајќи жени и деца.
Во соопштението, организацијата потврди дека се згрижени уште 180 ранети Палестинци, од кои повеќето страдаат од сериозни рани од шрапнели, скршеници, трауматски повреди и изгореници.
