Русија им претставила на САД список со барања за договор за прекин на војната против Украина и ресетирање на односите со Вашингтон, изјавија две лица запознаени со ова прашање за Ројтерс.
Американскиот претседател Доналд Трамп вчера изјави дека американските претставници одат во Русија за да разговараат за американско-украинскиот договор за 30-дневно примирје и за патот до мировните преговори.
Не е точно познато што понуди Москва.
Претходните руски услови вклучуваа Киев да не биде членка на НАТО, договор да не се распоредуваат странски трупи во Украина и меѓународно признавање на тврдењето на претседателот Владимир Путин дека Крим и четири провинции припаѓаат на Русија.
Русија, исто така, во последниве години побара од САД и НАТО да ги решат, како што ги нарече, „основните причини“ на војната, вклучително и проширувањето на НАТО кон исток.
Трамп го чека одговорот на Путин за тоа дали ќе се согласи на 30-дневно примирје што украинскиот претседател Володимир Зеленскиј во вторникот рече дека ќе го прифати како прв чекор кон мировните преговори.
Посветеноста на Путин за можен договор за прекин на огнот сè уште е неизвесна, а деталите допрва треба да се финализираат.
