Според палестинските власти, 142 земји од 193 земји-членки на ОН ја признале Палестина. Четири карипски земји (Јамајка, Тринидад и Тобаго, Барбадос и Бахамите) се последните земји кои се приклучија на списокот.



Шпанија, Ирска и Норвешка пред две дена најавија дека ќе ја признаат државата Палестина на 28 мај.

Минатиот месец, САД го искористија правото на вето во Советот за безбедност на ОН за да ја блокираат резолуцијата со која Палестина би ја прогласила за полноправна членка на меѓународната организација.

На 15 ноември 1988 година, неколку месеци по почетокот на првата интифада, лидерот на Палестинската ослободителна организација (ПЛО), Јасер Арафат го прогласи „основањето на државата Палестина“ со Ерусалим како главен град.

Неколку минути подоцна, Алжир беше првиот кој официјално ја призна новата држава.

40 земји, вклучувајќи ги Кина, Индија, Турција и повеќето арапски земји, го презедоа истиот чекор една денела подоцна. Следеа речиси сите земји од африканскиот континент и советскиот блок.

Во текот на 2010 и 2011 година, Палестина беше призната од мнозинството земји од Латинска Америка.

Под претседателство на наследникот на Арафат, Махмуд Аабас, палестинската самоуправа, формирана со Договорот од Осло (1993 година), започна дипломатска офанзива во меѓународните институции. УНЕСКО (Организација за образование, наука и култура на Обединетите нации) го отвори патот со признавањето на Палестина како полноправна членка во октомври 2011 година.

Во историското гласање во ноември 2012 година, Палестина доби статус на држава набљудувач во Обединетите нации, што, во отсуство на статус на полноправна членка со право на глас, и овозможи пристап до агенциите на ОН и меѓународните договори.

Во 2015 година, Палестинците се приклучија на Меѓународниот кривичен суд (МКС), кој овозможи отворање на истраги за израелските воени операции на палестинска територија. Соединетите држави и Израел ја осудија одлуката.

Во 2014 година, Шведска стана првата членка на ЕУ која ја призна државата Палестина.

Чешката Република, Унгарија, Полска, Бугарија, Романија и Кипар, како дел од тогашниот советски блок, го направија тоа долго пред да влезат во Европската унија.

Признавање на Палестина најавија Малта и Словенија, а таква можност најави и Австралија.

Македонија останува една од ретките земји без никакви политички или дипломатски односи со Палестина.