Првиот човек на Дирекцијата за заштита и спасување (ДЗС), Беким Максути, бара да се вратат пензионираните пилоти заѓшто од тројца оваа година остана само со еден обучен да лета со авионите за гасење пожари.
Авио-одделението на Дирекцијата е сѐ уште нефункционално и покрај предупредувањата на директорот на ДЗС дека „дополнителен предизвик ова лето ќе биде справувањето со шумските пожари“.
Во разговор за МИА, Максути вели за да се вратат двајцата обучени пилоти, ДЗС бара од Министерството за финансии плата во висина од 300.000 денари.
Според него, работното место пилот во ДЗС со плата од 72.000 денари е неатрактивно и затоа посочува дека потребно е порамнување на платите на државно ниво.
„За нив бараме дополнителни средства колку што се плаќаат пилотите на Владата, кои што го летаат владиниот авион, тоа значи 300.000 денари.
Треба да има синхронизација, односно порамнување на платите на ниво на држава, затоа што тие навистина летаат многу помалку од нашиве и се многу побезбедни. Исто така и пилотите вработени во МВР, кои имаат максимум 50 часови на годишно ниво, доколку пилотите во ДЗС имаат од 150 до 300 часови“, вели Максути.
За да може да извршува летови авио-одделението на ДЗС, потребни се минимум тројца пилоти.
Максути вели Дирекцијата не смее да извршува задачи со еден пилот, односно мора да има уште минимум двајца пилоти.
Како што појасни директорот на ДЗС, според правилата пропишани од Европската асоцијација за цивилно воздухопловство (ЕАСА), пилотите пред секој лет вршат меѓусебна контрола за нивната психичка и физичка подготвеност.
Директорот вели дека во април годинава апелирал тогашната Влада сериозно да го сфати овој проблем, бидејќи се доведува до прашање постоењето на авио-одделението на ДЗС.
Нагласи дека според критериумите на Агенцијата за цивилно воздухопловство, засновани врз регулативите на ЕАСА, постои можност ДЗС да ја изгуби лиценцата за пловидбеност.
