Нов концепт во безбедноста, каде покрај членовите по функција во Советот за безбедност кој го формираше претседателката Гордана Сиљановска ќе членуваат eксперти и луѓе кои во јавноста се критичари.
Претседателката Гордана Сиљановска Давкова, согласно своите уставни надлежности, ги именуваше Малинка Ристевска Јорданова, експертка за евроинтеграции, Џевдет Хајредини, поранешен министер за финансии и Владо Спиридонов, експерт за климатски промени, за членови на Советот за безбедност.
Според изборот на членови кои ги предлага таа, шефицата на државата смета дека темите евроинтеграции, климатски промени и финансии се важни во анализата која што треба да ја прави Советот за безбедност.
Покрај експертизата на новите членови која е во области кои досега претходните претседатели не го сметале за важни Сиљановска именува луѓе кои во јавноста важат за независни од политичките партии и без влакна на јазикот подготвени да критикуваат без разлика кој е на власт.
„Со именувањето на тројцата членови од страна на претседателката Сиљановска Давкова, Советот за безбедност на Република Македонија е во полн состав“, се наведува во соопштението на Кабинетот на претседателката Сиљановска Давкова.
Членови на Советот за безбедност по функција се и Африм Гаши, претседател на Собранието, Христијан Мицкоски, претседател на Владата, Панче Тошковски, министер за внатрешни работи, Владо Мисајловски, министер за одбрана, Тимчо Муцунски, министер за надворешни работи и надворешна трговија.
