Сериозни теми, сериозен протокол со присуство на делегации од многу држави на безбедносната конференција во Минхен, но само една делегација личи на расштиман оркестар – за жал, тоа е македонската делегација, го коментира пратеникот и поранешен министер за надворешни работи Антонијо Милошоски присуството на шефот на држаавта Пендаровски и техничкиот премиер Џафери кои, скако што вели, ја предводат „двоглавата“ делегација.
„Имено, според дипломатските правила, една држава на меѓународна конференција не може истовремено да ја претставуваат претседателот на државата и премиерот, бидејќи и двајцата го имаат највисокиот ранг – шеф на држава и шеф на влада.
Како шеф на делегацијата оди или претседателот, или оди премиерот, но никако двајцата заедно.
Во случајот со Македонија, на конференцијата во Минхен, присутен е и Претседателот Пендаровски, а истовремено таму е и техничкиот премиер Талат Џафери.
Двајцата имаат по неколку соработници во нивна придружба.
Згора на тоа, со група свои соработници таму е и министерот за надворешни Османи, оној кој би требало да му укаже на премиерот дека двоглави делегации на една иста конференција не праќаат ниту државите кои служат за потсмев на меѓународата сцена“, пишува Милошоски на Фејсбук.
„Двоглавото претставување ќе биде за потсмев кај другите делегации кои лесно ќе забележат дека во Македонија не постои координација меѓу трите кабинети (Претседател, Премиер, МНР) кои се задолжени за надворешната политика.
Замислете колку бил зачуден британецот Сер Стјуарт Пич, специјен пратеник за Западниот Балкан, кого и претседателот Пендаровски и техничкиот премиер Џафери го сретнаа на две одвоени средби, како патувањето до Минхен да им е последното патување во кариерата.
Или можеби Сер Стјуарт Пич веќе знае дека во Македонија кавгата за казината на ДУИ со “европско знаменце” е побитна од координацијата меѓу претседателот, премиерот и министерот за надворешни за нормално меѓународно претставување на државата?!“, вели Милошоски.
