Големите метрополи се украсуваат, се чувствува магијата од секој агол, додека кај нас, за жел свири иста песна, а таа се вика „пусто и празно е се…“ Дури сега, Град Скопје крои планови. Трговскиот центар „Галерија Лафајет“ во Париз секоја година ги воодушевува луѓето ширум светот со својата раскошна божиќна елка и прекрасните празнични декорации на големите прозорци. Па, така и годинава, уште еднаш докажа дека најголемата празнична еуфорија во Париз може да се почувствува токму тука.
Во Загреб и Љубљана се чувствува новогодишната атмосфера. Таму уште од пред десет дена започнаа подготовките за новогодишната ноќ. Во главниот хрватски град веќе се поставуваат штандови и се подготвува лизгалиштето во пресрет на популарниот божиќен саем Адвент, настан кој нуди разновидна храна и богата музичка програма. Љубљана пак од пред две недели почна да го расчистува центарот на градот, а деновиве е најавено дека ќе биде поставена и новогодишната елка.
Граѓаните кои ги анкетиравме посакуваат Скопје што поскоро да почне да се украсува. Градоначалничката Арсовска запрашана за тоа, не откри кога во Скопје би се почнало со украсување.
- Постапките се веќе отпочнати и верувам дека од наредната недела ќе имаме повеќе информации за јавноста и за новогодишната ноќ и за се останато, изјави Данела Арсовска.
Минатата година украсувањето во центарот на Скопје започна на две недели пред Новата година. Дел од украсите висеа по улиците и во март, а дури во арпил беа тргнати куќарките кои беа поставени на градскиот плоштад.
