Американскиот неделник „Њузвик“ објави мапа на која се гледа како лидерите на Русија, САД и Кина би можеле да го поделат светот на сфери на влијание, според која Македонија би потпаднала под руското!
Магазинот направи паралела меѓу процесот насочен кон решавање на конфликтот во Украина и средбата на лидерите на СССР, САД и Велика Британија на конференцијата во Јалта во 1945 година, која, како што пишуваат авторите на написот, „ѝ претходеше на поделбата на Европа“.
Според оваа карта, сферата на влијание на Русија (означена со црвено) би можела да ја вклучи Европа, како и Задкавказјето и Турција. САД (означени со сина боја) ќе го прошират своето влијание на Северна Америка и Гренланд, а Кина (означена со жолто) – во Југоисточна Азија. Јапонија, Индија и Пакистан, исто така, би можеле да паднат во сферата на влијание на Кина.
Меѓутоа, Средна Азија, Блискиот Исток, Африка, Латинска Америка, Австралија, Нов Зеланд и Монголија не се класифицирани во ниту една од овие три сфери. Неделникот додава дека Средна Азија би можела да биде област на борба меѓу Русија и Кина.
Во почетокот на април лидерот на најголемата фракција во Европскиот парламент, Европската народна партија, Манфред Вебер, изјави дека новиот светски поредок е создаден поради кардинална промена во надворешната политика на САД.
Тој додаде дека светот почнал да се дистанцира од Вашингтон поради постапките на американскиот претседател Доналд Трамп и бара нови партнери.
Од друга страна, кинескиот министер за надворешни работи Ванг Ји изјави дека односите меѓу Пекинг и Москва претставуваат стабилизирачки фактор во турбулентниот свет.
