Македонска алијанса за европска интеграција, МАЕИ, единствената македонска партија во Албанија, стана полноправна членка на Европската слободна алијанса (ЕФА).
Одлуката била едногласно донесена од делегатите на Генералното собрание на Европската слободна алијанса во Брисел, информираше, Васил Стерјовски, лидер на партијата, пренесе МКД.Мк.
„Посветени сме на промовирање на овие вредности во Албанија и низ Европа. Нашата соработка со партиите членки на Европската слободна алијанса, како што се Виножито од Грција и ОМО Илинден Пирин од Бугарија, ја нагласува нашата посветеност на овие идеали. Инспирирани од визијата на Европската слободна алијанса, ние сме желни да придонесеме со нашите уникатни перспективи и искуства во Алијансата“, рече Стерјовски, кој ќе има обраќање на овој собир.
Тој заедно со координаторот за меѓународна соработка во партијата, Генти Јанкула, вчера имаа средба со претставници на Советот на Европа и советодавниот комитет на Рамковната конвенција за заштита на националните малцинства што ја оценија како „историска пригода, која означува значајна пресвртница за нашата партија и за Македонците во Албанија“.
