Украина ќе се обиде да го придобие Доналд Трамп на своја страна со тоа што ќе покаже дека Володимир Зеленски сака војната со Русија да заврши што е можно побрзо, пишува Фајненшл тајмс.
Официјални лица запознаени со подготовките за разговорите во Саудиска Арабија открија дека Киев ќе предложи делумен прекин на огнот со Русија, што ќе вклучува запирање на нападите со беспилотни летала и ракети со долг дострел и борбени операции во Црното Море. Украинската влада се надева дека напредокот во разговорите може да го натера Вашингтон да ја повлече својата одлука за замрзнување на размената на разузнавачки информации и снабдувањето со оружје.
Трамп вчера рече дека очекува „некои прилично добри резултати од Саудиска Арабија оваа недела“, додавајќи дека сака Украина „да покаже дека сака мир бидејќи тоа не го покажала доволно досега“.
Американскиот притисок врз Киев ја принуди администрацијата на Зеленски да го промени својот пристап по неуспешниот состанок во Белата куќа на 28 февруари.
„Тактиките се сменија“, рече Володимир Фесенко, политички аналитичар од Киев. „Сега најважно е да се нормализираат односите со САД. Ако порано планот беше прво да се обезбедат безбедносни гаранции, а потоа да се побара прекин на огнот, сега е јасно дека тоа нема да се случи по тој редослед. Трамп тврди дека Украина не сака прекин на огнот, па нашата цел е да им покажеме на САД дека сме подготвени да дејствуваме што е можно побрзо и да започнеме директни преговори со Русија“, додаде тој.
Зеленски им рече на лидерите на ЕУ во Брисел во четвртокот дека сака да склучи рамковен договор со САД што ќе го отвори патот за понатамошни детални договори за минералните ресурси и безбедносните гаранции.
Американскиот претседател беше вознемирен минатата недела кога неговиот украински колега сугерираше дека договорот за завршување на војната е сè уште далеку.
„Ако некој не сака да склучи договор, тој нема да трае“, рече Трамп потоа.
Ен-Би-Си Њуз објави дека американските власти веруваат дека договорот за минерали нема да биде доволен за да го натера Трамп да ја врати соработката со помошта и разузнавањето.
Според нив, Трамп сака да види промена во односот на украинскиот претседател Володимир Зеленски кон мировните преговори, вклучително и неговата подготвеност да направи отстапки како што е предавање на територија на Русија.
Трамп, исто така, сака Зеленски да направи одреден напредок кон одржувањето на изборите во Украина и евентуално да се повлече од местото лидер на земјата, изјавија официјални лица.
Портпаролката на руското Министерство за надворешни работи Марија Захарова минатата недела изјави дека секаква „пауза“ без „конечно решение“ е „апсолутно неприфатлива“.
