Во пресрет на денешната церемонија на отворањето на Олимписките игри во Париз, израелскиот министер за надворешни работи Израел Кац предупреди за можни напади од групи спонзорирани од Иран врз израелски спортисти.



„Во моментов имаме проценки во врска со потенцијалната закана од иранските терористички посредници и други терористички организации насочени кон членовите на израелската делегација и израелските туристи за време на Олимпијадата“, напиша Кац во писмото до неговиот француски колега Стефан Сежурн, пренесува Тајмс оф Израел.

Можни терористички напади би можеле да бидат насочени против членовите на израелската олимписка делегација и израелските посетители на Игрите, рече Кац.

Тој, исто така, му се заблагодари лично на францускиот колега кој се понуди да биде домаќин на меморијалот за 11-те израелски спортисти масакрирани на Олимписките игри во Минхен во 1972 година.

Групите со терористичко потекло поврзани со Иран ги вклучуваат палестинскиот исламистички Хамас и либанскиот Хезболах.

Кац му се заблагодари на францускиот претседател Емануел Макрон за безбедносните мерки без преседан што земјата домаќин ги презеде за израелските олимписки учесници.

Израелската делегација ќе биде под посебна заштита на Игрите во Франција. Нивните тимови и поединечни спортисти ќе бидат чувани од француската полиција во текот на целиот ден.