Израелската влада сподели, а потоа избриша објава на социјалните мрежи со сочувство за смртта на папата Франциско, без да каже зошто, иако израелски весник ја поврза одлуката со критиките на покојниот папа за војната во Газа, јави Ројтерс.
Профилот @Israel објави во понеделникот порака на платформата на социјалните мрежи Х која гласеше: „Почивај во мир, папа Франциско. Нека е благослов неговиот спомен“, заедно со сликата на папата од минатогодишната посета на Западниот ѕид во Ерусалим.
„Ерусалим пост“ ги цитираше претставниците на Министерството за надворешни работи дека папата давал „изјави против Израел“ и дека објавата на социјалните мрежи била „по грешка“.
Министерството за надворешни работи, не одговори веднаш на барањето на Ројтерс за коментар.
Франциско, кој почина во понеделникот на 88-годишна возраст, минатиот ноември предложи светот да проучи дали израелската воена кампања во Газа претставува геноцид врз палестинскиот народ, во некои од неговите најексплицитни критики досега за однесувањето на Израел во неговата војна со Хамас, која започна во октомври 2023 година.
Во јануари папата, исто така, ја нарече хуманитарната ситуација во Газа „срамна“, предизвикувајќи критики од главниот еврејски рабин во Рим, кој го обвини Франциско за „селективна огорченост“.
Израел изјави дека обвиненијата за геноцид во неговата кампања во Газа се неосновани и дека единствено ги ловат Хамас и другите вооружени групи.
Израелскиот премиер Бенјамин Нетанјаху, кој ја предводи екстремно десничарската коалиција на верски и националистички партии, не ја коментираше смртта на папата.
Меѓутоа, израелскиот претседател Исак Херцог во понеделникот испрати порака со сочувство до христијаните во Светата земја и ширум светот, опишувајќи го Франциско како „човек со длабока вера и безгранично сочувство“.
