Еден ученик е убиен, а двајца други се ранети во напад со нож пред средното училиште Санта Ана во истоимениот град во Јужна Калифорнија, пренесоа медиуми
Tројцата ученици биле пренесени во болница, каде еден од нив починал, додека другите двајца биле во стабилна состојба.
Инцидентот се случил додека учениците го напуштале училиштето по завршувањето на часовите, изјави портпаролот на училишниот округ, Фермин Лил.
Според официјалните лица, во нападот учествувале и лица кои не биле ученици на училиштето.
Полицијата бара најмалку две лица осомничени за нападот, а нивната поврзаност со училиштето и мотивот за нападот засега се непознати.
По инцидентот, сите воннаставни програми и спортски активности беа откажани.
Санта Ана, град со околу 300.000 жители, се наоѓа 50 километри југоисточно од Лос Анџелес.
Во средното училиште Санта Ана настава посетуваат околу 3.000 ученици.
