Европа сака да го избегне хаосот што би настанал доколку САД еднострано решат да се повлечат од НАТО.
Овој страв расте поради постојаните закани на американскиот претседател Доналд Трамп дека би можел да го ослабне, па дури и да го напушти сојузот што ја штитеше Европа речиси осум децении.
Највисоките европски воени сили подготвуваат планови за преземање поголеми одговорности од САД за одбраната на континентот, вклучително и предлог до администрацијата на претседателот Доналд Трамп за контролиран трансфер во следните пет до 10 години, објави Фајненшл тајмс.
Целта е да се изработи план за префрлање на финансискиот и воениот товар на европските земји и да се претстави пред САД пред годишниот самит на НАТО, кој ќе се одржи во јуни во Хаг.
Предлогот ќе содржи цврсти заложби за зголемување на европските одбранбени трошоци и зајакнување на воените капацитети, сето тоа во обид да се убеди Трамп да се согласи на постепено пренесување на одговорноста. Ова ќе им овозможи на САД повеќе да се фокусираат на Азија.
Соединетите Држави, кои трошат повеќе за одбрана од сите други сојузници заедно, остануваат клучни за безбедноста на Европа.
Покрај нивната способност за нуклеарно одвраќање, која е поврзана со одбраната на Европа и вклучува американско нуклеарно оружје стационирано во неколку европски воздушни бази, САД обезбедуваат воени капацитети што европските сојузници ги немаат, управуваат со воздушни, поморски и копнени бази и одржуваат 80.000 свои војници во Европа.
Германија, Франција и Обединетото Кралство веќе почнаа да ги зголемуваат буџетите за одбрана или да ги забрзаат претходно планираните инвестиции откако Трамп беше избран за претседател. Европската унија, исто така, покрена иницијативи за да ги охрабри своите членки да инвестираат повеќе во одбраната.
Според проценките на европските претставници, би биле потребни меѓу пет и десет години за европските воени капацитети да се издигнат на ниво каде што би можеле да ги заменат повеќето американски капацитети – освен американскиот нуклеарен арсенал.
„Зголемувањето на потрошувачката е единственото нешто што можеме да го направиме – порамномерно да го шириме товарот и да ја намалиме зависноста од САД“, рече еден официјален претставник. „Разговорите штотуку почнаа, но задачата е толку голема што за многумина е поразителна“, додаде тој.
Основната одбрана на Европа секогаш ќе бара од Британија и другите атлантски поморски сили, нордиските земји за северниот дел на континентот и Турција за југоисточната одбрана, рекоа официјални лица – а НАТО веќе го има сето тоа.
„Дури и без Соединетите Американски Држави, НАТО обезбедува структура за безбедносна соработка во Европа“, рече Марион Месмер, виш соработник за меѓународна безбедност во британскиот тинк-тенк „Чатам хаус“.
„Постојат елементи кои би требало да се заменат доколку САД се повлечат, но НАТО обезбедува рамка и инфраструктура на кои се навикнати Европејците… Ова веќе прави голем дел од работата што би требало да започне од нула доколку се создаде целосно нова структура само за европските членки“, додаде Месмер.
