Во текот на овие денови значително се зголемени интервенциите на Итната медицинска помош, како последица на влошувањето на здравствената состојба на граѓаните на јавни места како и на нивните работни места.
Доктор Марина Сотировска од Итната медицинска помош вчера изјави дека само во последните 24 часа имало вкупно 85 интервенции, пренесе Телеграфи.
Таа нагласи дека најризичните групи од високите температури се старите лица и лицата со хронични заболувања, па затоа апелираше на претпазливост и да не излегуваат од дома во пладневните часови.
„Само во последните 24 часа сме имале 85 интервенции, 30 интервенции биле итни, имаме и разни несреќи во кои учествуваат автомобили, мотори, скутери, велосипеди, па дури и пешаци, високите температури ја намалуваат концентрацијата на луѓето, им слабее видот и прават грешки. кои доведуваат до несреќи. Сме имале и други случаи каде што како последица на високи температури доживеале инфаркт, мозочен удар или други повреди“, вели доктор Марина Сотировска.
Лекарите појаснуваат што предизвикува екстремната топлина на човековото тело и предупредуваат дека пациентите со висок притисок, но и оние кои имаат низок крвен притисок може да имаат големи проблеми и тешки последици по здравјето.
„Како што телото станува потопло, крвните садови се отвораат. Ова доведува до намалување на крвниот притисок и го тера срцето да работи понапорно за да ја турка крвта низ телото. Ова може да предизвика благи симптоми како што се чешање поради топлотен осип или отечени стапала бидејќи крвните садови се шират. Во исто време, потењето доведува до губење на течности и сол, заради што на удар се пациентите кои имаат константно низок притисок. Ова, во комбинација со намалениот крвен притисок, може да доведе до топлотна исцрпеност. Симптомите вклучуваат: вртоглавица, гадење, несвестица, конфузија, мускулни грчеви, главоболки, засилено потење, замор. Ако крвниот притисок премногу се намали, ризикот од срцев удар се зголемува“, велат матичните лекари кои деновиве се соочуваат со поголем број пациенти за „Фактор“.
