Американскиот генерал Весли Кларк кој во 1999-та го водеше бомбардирањето на Србија, синоќа на церемонија во Албанскиот театар ја доби титулата „Почесен граѓанин“ на Општина Чаир за „извонреден придонес за мир на Балканот“, јави ТВ 21.
„Денеска имаме посебна можност да оддадеме почит на една извонредна личност, лидер кој не само што водеше хуманитарна операција, туку со моќта на своето влијание тој ја обликуваше и ориентираше визијата за побезбеден, поправеден и постабилен свет.
Генералот Весли Кларк беше како гулаб на мирот, но облечен во воена униформа, чиј придонес е колосален во воспоставувањето стабилност и благосостојба“, изјави градоначалникот на општина Чаир, Висар Ганиу.
„Денеска е голема привилегија за мене и мојот син, кој е тука. Задоволство е да се биде овде во Скопје, да се види мир, просперитет и да се почувствува ентузијазам, за да се надеваме, да веруваме во иднината“, рече Весли Кларк.
Весли Кларк во 1997 година беше назначен за врховен командант на Обединетите сили на НАТО за Европа, а на 23 март 1999 година од генералниот секретар на НАТО, Хавиер Солана ја доби наредбата за почеток на воена реакција „за геноцидот во Косово од поранешна Југославија“.
Одлуката за бомбардирање на тогашната Сојузна Република Југославија беше донесена, првпат во историјата, без одобрение на Советот за безбедност на ОН.
