Со двата гола на Џибрил Дианеси во завршницата од натпреварот на Националната арена „Тодор Проески“ во Скопје, фудбалерите на Вардар го совладаа бранителот на трофејот Тиквеш со 2:0 и се пласираа во четвртфиналето на Купот на Македонија.
Францускиот напаѓач го отвори резултатот во 75. минута, крунисувајќи го контранападот на „црвено-црните“ а победата ја завери во четвртата минута од судиското продолжение.
Второлигашите Арсими и Детонит Плачковица ги елиминираа прволигашите Воска и Пелистер: тимот од Чегране славеше со 3:1 над охриѓани во Гостивар, а радовишани во Битола беа подобри пеналџии од пелистерци, откако мечот во основниот дел заврши 1:1.
На пенали во следната рунда помина и Силекс против Шкупи, откако на мечот во Кратово немаше голови во регуларниот дел.
Други резултати од осминафиналето: Брера – Беса 2:0, Гостивар – Брегалница 1:0, Шкендија – Шкендија Арачиново 1:0 и Струга – Македонија Ѓорче Петров 2:0.
