Како претседател на сите граѓани на Албанија, претседателот Илир Мета не смее да дозволи узурпирање на албанската држава од непостоечки жители и поради тоа не треба да го потпише указот за Законот за малцинствата.
Напротив, како претседател на Албанија, треба да побара негово повторно разгледување од страна на Парламентот на Албанија и исправање на направената грешка и неправда кон лојалните Македонци, жители на Република Албанија.
Македонското друштво „Илинден“-Тирана и неговиот огранок за Голо Брдо, доставија барање до албанскиот претседател Илир Мета, во кое се бара согласно неговите уставни надлежности, да го врати во Парламентот на повторно разгледување Законот за заштита на малцинствата.
Во барањето се посочува дека со Законот, кој е усвоен на 13 октомври 2017 година не може да се дозволи искривување на вистината со признавање на непостоечко бугарско малцинство во областите Преспа, Голо Брдо и Гора, кои се населени со припадници на македонското малцинство.
Членовите на Македонското друштво „Илинден“-Тирана и огранокот за Голо Брдо, во име на сите Македонци оценуваат дека признавањето на непостоечко бугарско малцинство претставува тешка повреда на меѓународните закони и конвенции бидејќи не се испочитувани основните принципи за прогласување на одредена национална груша за национално малцинство.
Исторските факти и пописите на населението спроведувани со децении наназад, потврдуваат дека во Република Албанија ниту еден жител не се изјаснил како припадник на бугарско малцинство.
Напротив, податоците јасно покажуваат дека во споменатите подрачја живее само македонско малцинство.
Во барањето потпишано од претседателот на друштвото Никола Ѓурѓај и на огранокот за Голо Брдо, Или Халилај, уште се наведува дека „македонското малцинство во Албанија смета оти ова претставува чекор назад во почитувањето на правата на Македонците во областите Преспа, Голо Брдо и Гора“.
Моментално, бугарското малцинство постои само во умовите на бугарските фукционери и квазинаучници во Софија.
И тоа ќе биде така се додека и ним не им стане јасно дека искривувањето на историјата и вистината нема да ја сменат реалната состојба, а таа е дека Македонците во Албанија не се Бугари, се вели во реакцијата на друштвата.
