Денеска, по шести пат се одржуваат парламентарни избори во последните три години во Бугарија, но аналитичари сметаат дека е малку веројатн изборите и овој пат да создадат услови за формирање стабилна влада која може да стави крај на долгата политичка нестабилност и да ги деблокира економските реформи.
Бугарија, најсиромашната членка на Европската унија и една од нејзините најкорумпирани држави, се бори со честите промени на владата по масовните антикорупциски протести во 2020 година. Оттогаш, беа одржани пет избори, кои на власт донесоа несигурни коалиции кои брзо се распаѓаа.
Последните истражувања на јавното мислење покажуваат дека ниту овој пат ниедна партијакоалиција нема да добие мнозинство.
Избирачките места се отвораат во 7 часот по локално време, а затвораат во 20 часот. Излезните анкети треба да бидат објавени веднаш по затворањето на гласачките места.
Првите делумни резултати се очекуваат околу полноќ.
Гласањето во неделата доаѓа падот на владејачката коалиција во март, која се состоеше од централно-десничарската партија ГЕРБ и реформистичката партија Продолжуваме со промената (ПП).
Според последната анкета на Галуп, објавена во петокот од новинската агенција БТА, ГЕРБ е во водство со 25,9 отсто од гласовите, а по неа следат три партии во тесна трка за второто место:
ПП добива 15,7 отсто од гласовите. Ултранационалистичката проруска партија „Преродба“ 15,5 отсто и Движењето за права и слободи (ДПС), кое го претставува главно големото турско малцинство, 15,3 отсто.
Изборите се двојни: Бугарите денеска ќе ги изберат и своите претставници за Европскиот парламент, но проблем може да биде малата излезност поради заморот од избори на граѓаните.
Според анкетата на Галуп, само 40% од испитаниците изјавиле дека планираат да гласаат.
