Mакедонската тенисерка Лина Ѓорческа утре од 10 часот ќе се бори за трофејот на турнирот во Аламинос кај кипарскиот град Ларнака, кој се игра на земјени терени и за награден фонд од 25 илјади американски долари, а противничка во финалето ќе ѝ биде петтата носителка Луција Ќириќ Багариќ од Хрватска, 214. на ВТА-листата во сингл.
Првиот женски рекет на Македонија, неделава 241. на ВТА-листата во поединечна конкуренција, во полуфиналето славеше со 7-5, 6-4 против Нурија Бранкачо (240.) од Италија.
Претходно, Ѓорческа ги победи и домашната претставничка Марија Сјопаха со 6-1, 6-1, потоа италијанската квалификантка Матилде Паолети (631.) со 6-3, 3-6, 7-5 и во четвртфиналето Ксенија Зајцева (439.) од Русија со 6-2, 6-2.
