Најдобрата македонска тенисерка Лина Ѓорчевска, 213. на ВТА-листата во сингл, успешно стартуваше на тенискиот турнир во словачкиот град Трнава, кој се игра на земјени терени и за награден фонд од 60 илјади американски долари.
Ѓорчевска славеше со 6-4, 6-4 по 107 минути игра против Русинката Полина Кудерметова (165.), ланскиот јуни 139. женски рекет во светот и помлада сестра на Вероника Кудерметова, пред две години деветта на ВТА-листата во поединечна конкуренција и втора во двојки.
Следна противничка на 29-годишната тетовка ќе ѝ биде подобрата меѓу првата носителка Маи Хонтама (115.) од Јапонија и домашната претставничка Ратка Зелничкова (554.).
