Сме имале Агенцијата за нуклеарна технологија – по 14 години (не)работа ќе биде укината

Започната процедурата за донесување одлука за затворање на Агенцијата за нуклеарна технологија формирана во 2010 година откако по цели 14 години се увидело дека е сосема непотребно нејзиното постоење, објави МКД.Мк



Законот за формирање на национална агенција за нуклеарна технологија беше донесен во 2010 година на предлог на тогашниот министер за образование Никола Тодоров.

Идејата при формирањето на оваа Агенција беше развој на технологии и истражувања од областа на нуклеарната физика, физиката на елементарните честички и други истражувања од областа на нуклеарната наука.

Целта беше преку Агенцијата да се учествува во научните програми на Европската организација за нуклеарни истражувања ЦЕРН, учество на научници, инженери, техничари и друг стручен кадар од Република Македонија во истражувачките проекти на ЦЕРН…

Секоја година во Буџетот биле определувани средства за работа, но последен пат оваа Агенција потрошила средства во 2014 година. Претходно на сметката на Агенцијата се уплаќале трошоци за патување во странство, но нема информации кој од таа сметка отпатувал во странство. Пари се одвојувале само за хонорарите на членовите на управниот одбор и за академик од МАНУ. Оваа агенција финансиски била активна само две години, дознава Алсат.
Слободен печат, пак, дознава дека Агенцијата имала канцеларии во зградата карши Уставен суд до Советот за јавни обвинители, а последните пари што ги потрошиле биле 2.5 илјади евра за теписи во мај 2014 година.