Првата седница на Европскиот парламент во 2025 година започнува денес во Стразбур и ќе трае до четврток. Европратениците ќе разговараат за програмата на шестмесечното полско претседавање со Советот на ЕУ и ќе се осврнат на повеќе теми од надворешната политика. Се очекува посебно место да заземе и влијанието на новоизбраниот американски претседател Доналд Трамп врз трансатлантските односи.
Во вторник, еден ден откако Трамп ќе ја преземе функцијата, членовите на Европскиот парламент ќе разговараат за можните последици од неговиот втор мандат врз трансатлантските односи. Во расправите ќе учествуваат претставници на полското претседателство со Советот на ЕУ, како и на Европската комисија. Европратениците веројатно ќе покренат безбедносни прашања во контекст на постојаните барања на Трамп Европа да троши повеќе за одбраната.
Се очекува насочување на консултациите во Европскиот парламент и кон поддршката за Украина, односите со Русија, Кина, Блискиот Исток, климатските промени и трговијата. Утре ќе има и пленарна седница, на која европратениците ќе ги оценат неодамнешните медиумски извештаи во кои се тврди дека унгарското разузнавање шпионирало европски претставници кои истражувале измами во земјата.
Во среда европратениците ќе се сретнат со полскиот премиер Доналд Туск, за да разговараат за програмата на шестмесечното полско претседавање со Советот на ЕУ, кое започна на 1 јануари. Во дискусиите ќе учествува и претседателката на ЕК Урсула фон дер Лајен. Мотото на полското претседателство е – „Безбедност, Европа!“
В среда, европратениците ќе ги проценат и резултатите од самитот на ЕУ на 19 декември со претседателот на Европскиот совет Антонио Кошта и претседателката на Европската комисија Урсула фон дер Лаен.
Во четврток, европратениците и претставниците на ЕК ќе разговараат за глобалните правила за криптопарите, вклучително и начините за обезбедување заштита на инвеститорите, борбата против финансискиот криминал и конкурентноста на ЕУ.
