Пишуваат: Катерина Златановска Попова и Александра Шчибич – Копиец
Светскиот економски форум неодамна објави дека до 2027 година машините ќе извршуваат речиси 50% од сите работни задачи. Во исто време, ќе се појават над 100 милиони нови работни места, особено во секторите на вештачка интелигенција, одржливост и вселенско истражување. Во оваа нова ера, не станува збор само за автоматизација, туку за редефинирање на самата природа на трудот.
Во рамките на серијалот „Индустрија 5.0: Професии на иднината“, денес ве запознаваме со две професии кои изгледаат како научна фантастика, но се реалност која брзо ќе стане секојдневие.
Terraforming Engineer – Архитектот на новите светови
Кога ќе помислите на колонизација на Марс, најверојатно прво ви паѓаат на ум ракети и астронаути. Но, кој ќе го направи Марс погоден за живеење?
Одговорот е Terraforming Engineer – визионерски научник кој ја претвора вселенската пустина во место за живеење на обичните луѓе.
Овие инженери користат комбинација од биоинженерство, климатологија, екологија и вештачка интелигенција за да создадат атмосфери, да топат ледени карпи, да внесат кислород преку алги и да создадат целосни екосистеми на други планети.
Според извештајот на Space Frontier Foundation, до 2040 година овие експерти ќе бидат меѓу најбараните во вселенската индустрија.
Нивната работа не е важна само за вселената – технолошките решенија кои ги развиваат веќе се користат и за справување со климатските промени на Земјата. Од лаборатории до симулациски мисии во Аризона и Хаваи, овие инженери ја градат иднината на човештвото – и на Земјата, и надвор од неа.
AI Ethicist – Чуварот на одговорната вештачка интелигенција
Додека AI трансформира сè – од медицина до правосудство – сè поголема е потребата за етичко водство.
Тука стапува на сцена Chief Specialist in the Ethical Use of Artificial Intelligence, познат и како AI Ethicist или Етичар за вештачка интелигенција.
Овој експерт ја следи примената на AI, осигурувајќи се дека алгоритмите не се пристрасни, дека одлуките се транспарентни, а податоците – заштитени.
Со воведувањето на Европскиот AI акт, кој веќе стапи на сила во август 2024 година, улогата на AI Ethicist станува клучна за компаниите кои сакаат да бидат во чекор со регулативите и да изградат доверба кај своите корисници.
Со комбинација од техничко знаење, етика, право и човечки вредности, овие професионалци се вистински чувари на дигиталната етика, особено во чувствителни области како што се здравство, образование и финансии.
Дали сме навистина подготвени за иднината што сами ја обликуваме?
Додека Terraforming Engineers ја цртаат архитектурата на нови светови, а AI Ethicists се грижат технологијата да остане во служба на човекот, едно прашање тивко одекнува:
Која ќе биде твојата улога во утрешниот свет?
Можеби иднината уште не е напишана, но нејзините автори сме токму ние – денес.
Во следното издание од серијалот „Индустрија 5.0: Професии на иднината“, ќе откриеме уште три фасцинантни занимања:
Експерт за верификација на длабоки фалсификати (верификатор на deep fakes)
Инженер за роботика за поврзување човек-машина (инженер за роботика)
Главен кустос на податочни сетови (куратор на податоци)
Бидете дел од иднината – следете нè и откријте ја професијата што можеби ќе ја промените… или ќе ве промени вас!
Проектот е поддржан од Европската комисија и се реализира во партнерство со организацијата KnowledgeUp од Полска и ФУТУРАМА 4П од Македонија.
