Со повисоки плати за академскиот кадар и поголем буџет за УКИМ ја одбележуваме петгодишнината од формирањето на Сојузот на синдикатите на Универзитетот „Свети Кирил и Методиј“ Скопје, истакна министерката за образование и наука Весна Јаневска на научната конференција „Новите предизвици во високото образование и Синдикалното движење“ организирана по повод годишнината од годишнината.
„Ние градиме партнерства со синдикатите. Преку конструктивен социјален дијалог успеавме да ги зголемиме платите во високото образование. Од јануари годинава на повеќето вработени на државните универзитети им се зголемиле бруто платите, без минато искуство, во просек за околу 14%. За помал дел од вработените зголемувањето во просек е околу 8 отсто“, потенцира Јаневска.
Буџетот на УКИМ годинава е зголемен за 1,5 милијарди денари. Од 2,2 милијарди денари лани, годинава достигна 3,7 милијарди денари.
„Сето ова покажува дека Владата и Министерството за образование и наука се решени да направат вистински исчекор во квалитетот на образованието, вклучително и високото образование. Затоа имаме зголемени инвестиции, но секогаш јасно ставам до знаење дека нашите очекувања и од академската заедница се големи“, рече Јаневска.
Тоа значи дека универзитетските професори мора да бидат вистински ментори за студентите, помагајќи им да се здобијат со најквалитетни знаења и вештини додека истовремено и континуирано работат на нивниот научен развој и објавувајќи трудови.
Јаневска нагласи дека овие критериуми за стекнување и одржување на титулата професор на светски познати универзитети треба да важат и овде, доколку сакаме нашите универзитети да бидат видливи на листите на најдобрите. Значи, како што нагласи таа, не се работи само за престиж, туку ќе им овозможи на нашите студенти да се стекнат со најдобра подготовка за предизвиците што ќе ги донесе утрешниот ден.
Министерката Јаневска побара заеднички ангажман на сите релевантни фактори за да изградиме високообразовен систем со модерни студиски програми, да ја интегрираме науката и истражувањата во наставните програми и да ја зајакнеме соработката со академската заедница во земјата и надвор.
