Генералниот секретар на НАТО, Јенсен Столтенберг соопшти дека на самитот во Вашингтон следниот месец, сојузниците во НАТО се очекува да се договорат за нов систем за давање попредвидлива и долгорочна безбедносна помош и воена обука на Украина.
Но, „Унгарија нема да учествува во овие напори на НАТО и јас ја прифаќам таа позиција“, изјави Столтенберг во Будимпешта по разговорите со унгарскиот премиер Виктор Орбан, јавува Euronews.
Столтенберг истакна дека тој и Орбан се договориле за условите Унгарија да не учествува во поддршката на НАТО за Украина. Шефот на НАТО не прецизираше како тоа ќе се направи.
„Ниту еден персонал од Унгарија нема да учествува во овие активности и нема да се користат унгарски средства за нивна поддршка“, рече Столтенберг.
„Во исто време, премиерот ме увери дека Унгарија нема да се спротивстави на овие напори, кои ќе им овозможат на другите сојузници да продолжат да даваат помош и потврди дека земјата ќе продолжи целосно да ги исполнува своите обврски кон НАТО“, додаде Столтенберг.
