„Има политички структури и сили во државата кои ќе злоупотребуваат и ќе манипулираат со одредена група на луѓе, со цел да предизвика етнички инцидент, за да можат да ги заштитат богатството и се она, што го крадеа изминативе седум години од граѓаните без разлика на нивната етничка припадност. Токму тоа е единствениот начин да магнетизираат публика за најавената дестабилизација, или организирање протести, коишто ги планираат оваа есен.“ – истакна денес премиерот Христијан Мицкоски. Ова го објави весникот „Нова Македонија“.
„Не смееме како граѓани тоа да го дозволиме. Како Влада и како нејзин претседател апелирам до граѓаните да не наседнуваат на овие милионерски заговори. Тие заработуваат милиони и го злоупотребуваат граѓанинот. Додека тие печалат и летуваат во монденски летувалишта и додека скијаат во монденски скијалишта, купуваат трговски центри со ваши народни крадени пари. Да не дозволиме овие криминалци да ја дестабилизираат Македонија, затоа што Македонија е наша заедничка татковина и така ќе продолжиме и во иднина да се однесуваме како Влада.“ – рече Мицкоски во одговор на прашање при денешната прослава на 114-годишнината од раѓањето на скопјанката Гонџа Бојаџиу – Мајка Тереза.
Нагласи дека Гонџа Бојаџиу е личност, која што е светска, безвременска со нејзиното однесување. „На тоа што остана зад нејзе треба да сме горди ние, скопјани, коишто сме родени во овој град, што имаме таков сограѓанин и тука апсолутно нема ниту етничка, ниту верска, ниту каква било припадност. Како претседател на Владата имам должност, но и чест да можам да се поклонам пред делото на еден ваков лик, на една ваква личност, која што е безвременска и која што зад себе остави една голема димензија не само за родното Скопје, туку и за државата Македонија секаде во светот, иако животот го завршила во Индија во местото, кое што самата го создаде во градот Калкута.“ – посочи Мицкоски.
Прашан дали добил информација од министерот за внатрешни работи зошто биле отстранети навивачите на Шкендија од фудбалскиот натпревар во Струмица, рече дека за тоа треба да одговорат од Фудбалската федерација на Македонија. „Ние, како политичари не можеме да коментираме одлука на делегат, којшто е номиниран од страна на Фудбалската федерација на Македонија. Во Скопје има исклучително добра практика да нема гостување на гостински навивачи. Не гледам причина зошто тоа да не биде и низ Македонија, така да нема гостување на гостински навивачи и на тој начин да можеме да избегнеме ваков тип на настани, за коишто сега прашувате.“ – истакна Мицкоски.
