Израел извршил „геноцидни акти“ врз Палестинците со систематско уништување на здравствените установи на жените за време на конфликтот во Газа и користел сексуално насилство како воена стратегија, велат експертите на ОН во новиот извештај, пренесува Ројтерс.
Постојаната мисија на Израел во ОН во Женева ги опиша наводите во извештајот како неосновани, пристрасни и неверодостојни.
„Израелските власти делумно го уништија репродуктивниот капацитет на палестинските жени во Газа како група, вклучително и наметнувањето мерки наменети за спречување на породувањео, што е една од категориите на геноцидни акти во Римскиот статут и Конвенцијата за геноцид“, оценила Независната меѓународна комисија за истрага на ОН, мислејќи на окупираните палестински територии вклучувајќи го и Источен Ерусалим во Израел. .
Овие дела, заедно со зголемувањето на бројот на смртни случаи на мајки поради ограничен пристап до медицински материјали, претставуваат злосторство против човештвото со истребување, објаснуваат од комисијата.
Извештајот ги обвини израелските безбедносни сили дека користат присилно јавно соблекување и сексуална злоупотреба како дел од нивните стандардни оперативни процедури за казнување на Палестинците, по нападот предводен од Хамас врз јужен Израел во октомври 2023 година.
Израел ги отфрли обвинувањата:
„ИДФ (Израелските одбранбени сили) имаат конкретни директиви … и политики кои недвосмислено забрануваат такво однесување“, одговори постојаната мисија во ОН во Женева во соопштението, додавајќи дека нејзините процеси за преглед се во согласност со меѓународните стандарди.
