Задолжително месечно отчитување на броилата во домакинствата, бара Инженери на Република Македонија (ИНРМ) и ја повикува Регулаторната комисија за енергетика да изврши измена на Правилата за снабдување со електрична енергија.
Според ИНРМ, со воведувањето на блок-тарифите на 1 јули 2022 година РКЕ изврши измена на Правилата за снабдување со електрична енергија, што доведе до бројни поплаки од потрошувачите за паушално отчитување кое не соодветствува со реалната потрошувачка.
„РКЕ има обврска да го заштити правото на потрошувачите за фер наплата според реалната потрошувачка на електрична енергија.
Отчитувањето мора да се врши месечно, како што е предвидено за сите останати категории на приклучоци во Тарифниот систем за дистрибуција.
Продажбата на дистрибутивната мрежа на EVN беше мотивирана од потребата за модернизација и инвестиции, вклучувајќи воведување на дигитални броила со автоматско и далечинско отчитување.
Ова требаше да обезбеди месечно фактурирање според реалната потрошувачка, намалување на грешките и подобрување на наплатата. Затоа, РКЕ треба да изврши измена на Правилата за снабдување со електрична енергија и да воведе задолжително месечно отчитување на броилата!, стои во соопштението од ИНРМ.
