Американскиот претседател Џо Бајден повика на забрана за пушката употребена во саботата во обидот за атентат врз републиканскиот ривал Доналд Трамп, а во своето прво обраќање по тој настан рече дека политичката ситуација во земјата станала премногу вжештена.
„Помогнете ми да ги ослободам американските улици од ова воено оружје. АR-15 беше користен во пукањето на Доналд Трамп. Ова беше оружјето што уби многу други, вклучително и деца“, рече сегашниот претседател во Лас Вегас.
Тој рече дека му олеснало и дека е благодарен што Трамп не бил сериозно повреден на предизборниот митинг во Пенсилванија во саботата, па повторно повика општеството „да олади“.
„Нашата политика премногу се вжешти“, рече Бајден.
Обидот за атентат врз неговиот републикански ривал ја поттикна кампањата на Бајден во последните денови да ги повлече неговите телевизиски реклами, да се откаже од неговите вербални напади врз него и наместо тоа да се фокусира на пораката за единство.
